Hemeroteca

Revista “Bravú” nº 4

Ilustración para o relato “M.A.R.” de Rafael Lema.

Antonio Mouzo encara o futuro como unha busca de novas expresións

Para Antonio Mouzo a expresión artística pode desenvolverse por calquera das vías que lle permitan ó artista comunicarse co público. Por eso, aínda que comezou pola pintura, tamén realiza escultura, gravado, instalacións e vídeo porque, segundo di, “estou aberto a todo o que me dea oportunidade de expresar unha idea, sexa en situación estática ou en movemento”.

No seu estudio da Coruña, cara ó porto, este home nacido en Vimianzo prepara obras que, de momento, aínda no teñen un destino definido. Traballa por amor ó que fai e non pensa no seu futuro destino.

Tamén traballa cunha gran variedade de materiais. “Non me aferro ó tradicional, senón que busco aquilo que me pide a propia obra. Por exemplo, pintei cadros sobre sornáis nos que, ás veces, entre as pinceladas asoman as letras impresas como componentes da obra. Agora estou a facer un bosque no que os troncos das árbores son auténticas madeiras que vou atopando polo campo. Tamén teño outra obra que leva follas de árbores, pero nesta ocasión están feitas e recortadas sobre láminas de metal moi maleable”.

No estudio ten un gran cadro a piques de rematar no que se poden ver milleiros de flores feitas con masas de pintura, o que lles dá un carácter prácticamente escultórico. “Dentro da liberdade da miña obra tamén me gusta utilizar estes volumes feitos con pintura. No principio quixen representar un xardín e decidín que fora unha visión das flores realizada por unha persoa que as contempla dende arriba, coma se estíbese levitando. Por iso a perspectiva rompe coas máis tradicionais normas”.

Antonio Mouzo realizou diversos cursos no Círculo de Bellas Artes de Madrid e en talleres da Universidad Menéndez y Pelayo e Universidade de Vigo. Comezou a exponer na Coruña no ano 1975 e dende entón case tódolos anos deu a coñecer algunhas obras, ben en exposicións individuais ou ben en colectivas, algunhas destas forra de España. Participou en publicacións como carpetas de gravados, revistas e portadas e ilustracións de libros, entre eles Costa da Morte Blues de Manolo Rivas.

As súas obras de gran formato pódense ver en coleccións como as da Xunta de Galicia, Museo de Belas Artes da Coruña, Banco Exterior de España, Concello de Carballo, Consorcio de Santiago, Museo Carlos Maside, Caixavigo, así como en centros de saúde e colexios públicos da Coruña. Para este artista o futuro segue a ser unha busca de novas expresións e, sobre todo, de comunicación a través das formas artísticas que poidan cegar a todo o mundo.